Сообщества  >   Азаттық Радиосы  >   «Елбасы» мәртебесіне қарсы «ақ плакатшылар» аймақтарды аралады

«Елбасы» мәртебесіне қарсы «ақ плакатшылар» аймақтарды аралады

rss Азаттық Радиосы 1 июля 2010
Азаттық Радиосы
 

http://bit.ly/9wIay9


 


Тәуелсіздік алаңында жиналған бір топ азамат Қазақстанның саяси жүйесіне наразылықтарын жазуы жоқ ақ плакаттар арқылы білдірді. Алматы, 29 маусым 2010 жыл.

Тәуелсіздік алаңында жиналған бір топ азамат Қазақстанның саяси жүйесіне наразылықтарын жазуы жоқ ақ плакаттар арқылы білдірді. Алматы, 29 маусым 2010 жыл.



01.07.2010

Талғат ДҮЙСЕНБЕК

Алматыда кеше басталған «Ақ плакатшылар» наразылық акциясы бүгін Астана, Қарағанды және Өскемен қалаларында жалғасты. «Елбасы туралы» заңның қабылдануына қарсылығын үнсіз білдірген «ақ плакатшыларды» жергілікті полиция ұстап алып кетті.



БӘЙТЕРЕКТЕГІ НАРАЗЫЛЫҚ 

Қазақстан президенті Нұрсұлтан Назарбаевқа заңмен «елбасы» мәртебесі берілуіне қарсы оппозициялық «Алға» партиясын тіркеу комитетінің белсенділері бейсенбі күні Астанадағы «Бәйтерек» алаңында және Қарағанды облыстық әкімшілігінің ғимараты алдында наразылық акциясын өткізді.

Акцияға қатысушылар қолдарына ұстап шыққан ақ плакат – үнсіз наразалық белгісін білдіреді. Өйткені, жаңадан қабылданған «Елбасы туралы» заңда президент Назарбаевтың бейнесін бүлдіру іс-әрекеттерін жасағандарға айыппұл немесе үш жылға дейінгі мерзімге бас бостандығынан айыру жазасы берілетіндігі айтылған.

Тіркелмеген «Алға» партиясы Астана филиалының бастығы Руслан Симбиновтың Азаттық радиосына хабарлауынша, Астанадағы акцияға ұйымның тоғыз белсендісі қатысқан, бірақ олардың наразылық іс-әрекеті ұзаққа созылмаған.

– Маусымның 1-і күні сағат 11-де «Бәйтерек» монументінің жанына жиналдық. Ақ плакаттарды шығарғанымыз сол-ақ еді, бізді полиция ұстап алып кетті, – дейді Руслан Симбинов.

Оның айтуынша, құқық қызметкерлері оппозицияның тоғыз белсендісін Астананың Есіл аудандық полициясына алып барған. Ұсталғандардың үшеуіне сол жерде хаттама толтырылып, қалғандары босатылған. 

Аудандық полиция ғимаратында әкімшілік соттың басталуын күтіп отырған Руслан Симбинов, Данил Носенко және Ақатай Нұрышевтарға Қазақстан әкімшілік кодексі 373-бабының үшінші бөлімі негізінде митингтер мен шерулер өткізу тәртібін бір жылда қайта бұзған деген айып тағылды.

Заң бойынша мұндай әкімшілік тәртіпті бұзғандарға сот арқылы 50 айлық есептік көрсеткіш көлемінде айыппұл салынады немесе 15 күнге абақтыға қамалады. Бұған дейін «ақ плакатшыларға» Астанадағы «Бәйтерек» монументі жанында «Георгиев ленталарын» таратқаны үшін айыпұл салынған болатын. 

«АҚ ПЛАКАТШЫЛАР»  АЙМАҚТАРДА

Қарағандыдағы наразылық акциясы да астаналықтармен бір уақытта басталды. Алайда қарағандылық «ақ плакатшылар» өздерінің наразылық акцияларын өткізіп үлгерді. Осы акцияға қатысушылардың бірі Ксения Ермағанбетованың Азатттық радиосына хабарлауынша, полиция оларды қайтып бара жатқан жолда ұстап алып кеткен.

– Мен облыстық әкімшілік ғимаратына ақ плакатпен келдім. Тағы сегіз адам жиналды. Біз ақ плакаттарды шамамен сегіз минут бойы наразылық ретінде жоғары көтеріп тұрдық. Одан соң өз жұмыстарымызбен тарадық. Үш көліктегі полиция қызметкерлері бізді жолда тоқтатты. Акцияға қатысқан басқа да кісілерді аудандық полицияға әкеліпті, – деді Ксения Ермағанбетова.

Қарағандыдағы аудандық полиция бөліміне алты «ақ плакатшы» жиналды. Бірнеше сағаттан кейін полиция олардың төртеуін босатып, қалған екі кісі – «Алға» партиясын тіркеу комитетінің Қарағандыдағы филиалының басшысы Валентина Махотина мен ұйым жүргізушісі Нұрбек Күлейменовті әкімшілік тәртіп бұзған деп айыптап, әкімшілік іс қозғаған.

Ксения Ермағанбетованың айтуынша, іске қатысты әкімшілік сот бүгін өткізілуі мүмкін. 

«Ақ плакатшылар» наразлық акциясы бейсенбі күні Өскемен қаласындағы орталық алаңда да өтті. Бірақ жергілікті полиция үнсіз флеш-моб өткізгендерді ұстауды қажет деп таппаған.

Алматыдағы «ақ плакатшылар» акциясы туралы бейнехабарды қараңыз: http://bit.ly/c0t4BU


277


Владелец решил скрыть комментарии
Чтобы оставлять комментарии Вам необходимо войти или зарегистрироваться